15 сәуір күні сағат 16:00-де Әбілхан Қастеев атындағы Қазақстан Республикасының Ұлттық өнер музейінде бір шаңырақтан түлеп ұшқан шығармашылық әулет өкілдері: Мұхамеджан Зейнелхан, Гүлжай Құсман және Ботакөз Зейнелханның туындыларынан құралған
«Жады» атты көрменің ашылуы өтеді
Мұхамеджан Зейнелхан мен оның жары Гүлжай Құсман, сондай-ақ олардың қызы Ботакөз – өнерді өмірінің өзегіне айналдырған тұтас бір әулет. Көне қазақтың бізкесте өнері олардың шығармашылығында қайта жаңғырып, өзіндік өрнек тапқан. Әр туындысында дәстүр мен жаңашылдық шебер ұштасып, халық мұрасына деген терең құрмет пен оны келер ұрпаққа аман жеткізуге деген ізгі ниет айқын сезіледі. «Жады» атауының өзі халықтың ұжымдық жадын, көшпелі өркениеттің рухын, оның байлығы мен көпқырлылығын тереңінен танытады. Көрме ретроспективалық сипатта өтіп, әр жылдары дүниеге келген 50-ден астам шығарма көпшілік назарына ұсынылады.
Мұхамеджан Зейнелханның шығармашылық әлемі – кең тынысты, мазмұны бай көркем шежіре. Оның туындыларынан күнделікті тұрмыс көріністері де, көшпелі мәдениеттің салт-дәстүрлері де, мифологиялық сарындар мен терең философиялық толғаныстар да орын тапқан. «Шаңырақ», «Сарыарқа», «Бүркітші», «Дала дүбірі» сынды еңбектері арқылы суретші Ұлы даланың болмысын, ырғағын, кеңдігін және ішкі үйлесімін айшықты бейнелейді. Ол 1959 жылы Моңғолияда дүниеге келіп, Ұлан-Батыр қаласындағы көркемсурет училищесін тәмамдаған. Халықаралық және республикалық деңгейдегі көптеген байқаулар мен көрмелердің жүлдегері, «ЮНЕСКО Сапа белгісі» сертификатының иегері, «Биеннале-Ташкент-2002» көрмесінің дипломанты. Сондай-ақ кесте өнеріне арналған бірқатар кітаптар мен оқу құралдарының авторы. 2007 жылы есімі «Қазақстан рекордтар кітабына» енген.
Гүлжай Құсман – суретшінің жұбайы, кесте тігудің қыр-сырын анасынан меңгерген шебер. Қабырғаға ілінетін тұскиіздер, сәндік паннолар мен ұлттық нақыштағы киім үлгілері – оның еңбектерінің бір парасы ғана. Гүлжай дәстүрлі ою-өрнектерді заманауи бұйымдармен үйлестіріп, ұлттық өнерді жаңаша сипатта ұсынады. Шебер 1959 жылы Моңғолияда дүниеге келген. Ол Қазақстан қолөнершілер одағының мүшесі, «Шебер» республикалық байқауының екі дүркін жеңімпазы және «ЮНЕСКО Сапа белгісі» сертификатының иегері. Гүлжай Құсман 2014 жылы Парижде өткен ЭКСПО көрмесіне дайындық аясындағы көрмеде Қазақстан атынан өнер көрсетті. 2016 жылы Санта-Феде өткен Халықаралық ұлттық өнер жәрмеңкесіне қатысып, ел намысын халықаралық деңгейде абыроймен қорғады.
Ботакөз Зейнелхан – әулет өнерін жалғап келе жатқан жас буын өкілі. Т. Жүргенов атындағы Қазақ ұлттық өнер академиясын тәмамдаған ол өзіндік қолтаңбасын қалыптастырып үлгерген. Оның шығармаларында абстракция мен бейнелі пішіндер үйлесім тауып, күрделі символдар айқын сызықтар мен бояу ырғағы арқылы өрнектеледі. «Самұрық», «Ақ құс», «Көне қала» секілді туындылары түркі дүниесінің мифтік бейнелерімен үндесіп, ұшу, жол, жаңғыру сынды мәңгілік тақырыптарды қозғайды.
Отбасының ағартушылық қызметі де ерекше құрметке лайық. Олар өз өнері мен тәжірибесімен еркін бөлісіп, ұлттық мәдениеттің қадір-қасиетін дәріптеп келеді. Шеберлерге қазақстандық өнерді дамыту мен насихаттаудағы елеулі еңбегі үшін алғыс білдіре отырып, шығармашылық шабыт, зор денсаулық және ұзақ та жемісті ғұмыр тілейміз.
Куратор Н.А. Баженова Көрме 2026 жылдың 28 сәуіріне дейін жалғасады.
Жұмыс уақыты: 10:00 – 18:00. Демалыс күні: дүйсенбі.
