2026 жылдың 14 шілде мен 2 тамыз аралығында Қазақстан Республикасы Әбілхан Қастеев атындағы Ұлттық өнер музейінде «Корея – Орталық Азия» Алғашқы саммитіне орай және корей әліппесі Күнінің (Хангыль) 100 жыл толуына арналған K-Calligraphy корей каллиграфиясы көрмесі өтеді.
Алматы қаласындағы Корея Республикасының Бас консулдығы (Бас консул Ха Тэ Ук) «Корея – Орталық Азия» алғашқы саммитінің табысты өтуіне қолдау көрсету мақсатында, сондай-ақ Корея Республикасы, Қазақстан Республикасы және Орталық Азия мемлекеттері арасындағы мәдени-гуманитарлық ынтымақтастықты одан әрі нығайтуды көздеп «Хангыль: Ұлы Жібек жолында гүлдеген гүл» атты корей каллиграфиясы көрмесін ұйымдастырады.
2026 жыл корей мәдениеті үшін айрықша тарихи мәнге ие: биыл кәріс жазуының бастауына негіз болған «Хунминчжоным» тарихи ескерткішінің жарыққа шығуына 580 жыл, сондай-ақ Хангыль күнінің ресми түрде белгіленгеніне 100 жыл толып отыр. Көрме Орталық Азия елдерінде корей тілін үйренуге деген қызығушылықтың артуына орай ұйымдастырылып отыр. Экспозиция келушілерді заманауи корей каллиграфиясы туындылары арқылы хангыль әліпбиінің көркемдік-эстетикалық болмысымен таныстырып қана қоймай, мәдениеттер арасындағы өзара ықпалдастықты дамытудағы Корея Республикасы, Қазақстан Республикасы және Орталық Азия мемлекеттері арасындағы рухани үндестік пен өзара түсіністікті нығайтудағы маңызды рөлін айқындауды мақсат етеді.
«Корея – Орталық Азия» алғашқы саммитінің «Адам мен сенім арқылы байланыс» ұранына сәйкес көрме экспозициясы корё-сарам мұрасы, корейдің хангыль әліпбиі және Ұлы Жібек жолы арқылы халықтар арасындағы тарихи және мәдени сабақтастық идеясын паш етеді. Өзара ықпалдастықтың көркемдік символы ретінде Ұлы Жібек жолында жайқала гүлдеген гүлдер бейнесі алынып, мәдени қарым-қатынас пен халықтар арасындағы терең достықты бейнелейді. Аталған тұжырымдама Корея каллиграфия ассоциациясы және дизайн қауымдастығының мүшелері – 20 шебердің қазіргі заманғы корей каллиграфиясы (K-Calligraphy) техникасында орындалған шығармалары арқылы көркемдік шешімін тауып, экспозицияға ұсынылған.
Экспозицияда Орталық Азиядағы корей тілі мен мәдениетін сақтаудың бірегей символына айналған «Корё Ильбо» газетіне арналған туындылар ерекше орын алады. Келушілер назарына көрнекті каллиграф шебері Кан Бён Иннің «Корё Ильбо» газетінің 100 жылдық мерейтойына тарту еткен «Түп-тегіңе жақында» атты шығармасымен қатар, бірқатар каллиграфиялық жұмыстар ұсынылады. Басылым 1937 жылы Орталық Азияға күштеп қоныс аударылған кәрістердің ұрпақтарының күш-жігерімен бүгінгі күнге дейін жарық көріп, корё-сарам қауымының тілі мен мәдениетін, тарихи жадын сақтауға бағытталған орталық ретінде үздіксіз жарияланып келеді.
Көрменің салтанатты ашылуы 2026 жылдың 14 шілдесі сағат 10:00-де өтеді. Ашылу рәсімі аясында қазіргі корей каллиграфиясының (K-Calligraphy) негізін қалаушылардың бірі, Корея каллиграфия ассоциациясы және дизайн қауымдастығының төрағасы Ли Сан Хённің каллиграфиялық перформансы ұсынылады. Сондай-ақ көрме қонақтары Қазақстандағы корё-сарам шығармашылық ұжымдарының көшбасшысы саналатын Республикалық мемлекеттік академиялық корей музыкалық комедия театрының барабаншылар ансамблінің өнерін тамашалай алады. Театр ұжымы көп жылдан бері сахна өнері арқылы корей тілін, ұлттық дәстүрлер мен мәдени мұрасын сақтауда, насихаттауда тынбай еңбектеніп келеді. Ашылу салтанаты аяқталғаннан кейін келушілер үшін корей ұлттық тағамдарының (K-Food) дәмін тату рәсімі мен корей каллиграфиясы бойынша шеберлік сағаты ұйымдастырылады. Бұл шара қатысушыларға дәстүрлі корей каллиграфиясының негізгі қағидаларымен және орындау техникасымен жақынырақ танысуға мүмкіндік береді.
Алматы қаласындағы Корея Республикасының Бас консулы Ха Тэ Ук өзінің құттықтау сөзінде «Корея – Орталық Азия» алғашқы саммиті Корея Республикасы мен Орталық Азия мемлекеттері арасындағы өзара сенімге негізделіп, ортақ болашаққа бағдарланған ынтымақтастықты нығайтудың маңызды кезеңіне айналатынын атап өтеді. Бұл көрме Корея Республикасы мен Орталық Азия арасындағы мәдени байланыстарды қалыптастыруда маңызды рөл атқарған адамдардың және Хангыль әліпбиінің тарихи әрі мәдени маңызын жаңаша пайымдауға мүмкіндік береді әрі Корея Республикасы мен Орталық Азия мемлекеттері арасында берік мәдени көпір орнататынына сенім білдіреді.
Көрме 2026 жылдың 2 тамызына дейін жалғасады.
Жұмыс уақыты: 10:00–18:00.
Демалыс күндері: дүйсенбі және әр айдың соңғы күні.
Көрме кураторы:
Айдымбаева А.А.,
Шетел өнері бөлімінің жетекшісі.
