2026 жылдың 4 тамыз 16:00-де Әбілхан Қастеев атындағы Қазақстан Республикасының Ұлттық өнер музейінде заманауи қазақстандық мүсін өнерінің көрнекті өкілі мүсінші Павел Шороховтың 80 жылдық мерейтойына арналған «ПАВЕЛ ШОРОХОВТЫҢ ҚАЛАСЫ МЕН ДӘУІРІ» атты мерейтойлық ретроспективалық көрмесінің ашылуы өтеді. Экспозиция суретшінің шығармашылық жолын кең көлемде қамтитын оқиғаға айналмақ, 1970-жылдардағы студенттік туындыларынан бастап, мерейтой қарсаңындағы соңғы еңбектеріне дейінгі әр кезеңді бір арнаға тоғыстырады.
Павел Шороховтың есімі Қазақстан қалаларының көркем келбетімен тығыз байланысты, Алматы, Астана мен еліміздің қалаларындағы монументалды туындылары бүгінде бірнеше ұрпақтың мәдени жадында сақталып әрі қалалық ортаның құрамдас бөлігіне айналып үлгерді. Шебер қолынан шыққан мүсіндер қаланың алаң-саябақтарына, жаяу жүргіншілер көшелері мен қоғамдық кеңістіктерге көрік беріп, сәулет пен өмірдің табиғи бояуын үйлестіре бейнелеп, қаланың көркемдік болмысын аша түседі.
Көрмеде автордың елу жылдық шығармашылық жолын айғақтайтын туындылары ұсынылады. Келушілер станоктық мүсіндерді, портреттік жұмыстарды, анималистік композицияларды, философиялық және абстрактілі ізденістерді, сондай-ақ Қазақстанның әр өңірінде орналасқан монументалды шығармалардың фотоматериалдарын тамашалай алады. Экспозициядағы негізгі кураторлық назар – соңғы жылдары дүниеге келген жаңа туындыларға бағытталған. Олардың басым бөлігі көрермен назарына алғаш рет ұсынылып отыр. Көрменің басты тұжырымдамасы – суретші шығармаларының қалалық кеңістіктегі тағдыры туралы баяндауы болмақ. Павел Шороховтың көптеген мүсіндері Қазақстанның мәдени ландшафтының ажырамас бөлігіне айналғанымен, кейбірінің тағдыры күрделі болды. Жекелеген туындылар қоғамдық кеңістікте із-түссіз жоғалды, кейбірі жойылып кетті, кейбірінің тек архивтік суреттері ғана бар, кейбірі тек қала тұрғындарының жадында ғана сақталған. Көрме Павел Шороховтың шығармашылық мұрасын таныстырумен ғана шектелмейді, сонымен қатар алаң-саябақтардағы монументалды мүсіндерінің сақталуы мен қаланың мәдени жадын қорғау мәселелерін назарға алатын мәдени жоба ретінде де қарастырылады.
Көрменің жобалық ерекшелігі – ұрпақтар арасындағы шығармашылық диалог. Павел Шороховтың мүсіндік туындыларымен қатар экспозицияға оның ұлы, кескіндемеші Дмитрий Шороховтың шығармалары да енгізілген. Әке мен баланың бір көрмеде тоғысуы көркемдік дәстүрдің жалғастығын айшықтап, мүсін мен кескіндемені, пластика мен жарықты, қала мен адамды ортақ мәдени жадының тұтас кеңістігінде тоғыстырады. Мерейтойлық көрме Павел Шороховты монументалды ескерткіштер мен мүсіндік ансамбльдердің авторы ретінде ғана емес, сонымен қатар станоктық мүсін өнерінің нәзік те терең шебері ретінде де жаңа қырынан танытады. Оның туындыларының ішкі қозғалысы мен өміршең қуатын айқын сезіндіреді. Ол суретшілік пен мүсін өнерінің көркемдік мүмкіндіктерін кәсіби деңгейде игерген әмбебап шебер ретінде көрінеді.
Көрме өнертанушыларға, сәулетшілерге, суретшілерге, жоғары оқу орындарының студенттеріне, сондай-ақ Қазақстанның заманауи бейнелеу өнері мен ұлттық мүсін өнерінің тарихына қызығушылық танытатын көпшілік қауымға арналған.
БАҚ өкілдеріне арналған ПРЕСС-КӨРМЕ. Алдын ала аккредитациядан өту – 4 тамыз, 14:00. Музейдің баспасөз қызметі: +7 707 781 67 27
Көрменің салтанатты ашылуы 4 тамыз, 16:00. Көрме 30 тамызға дейін жалғастырады. Көрме жобасының кураторы – Оксана Танская. (WhatsApp: +7 777 298 90 49).*
