Әбілхан Қастеев атындағы ҚР Мемлекеттік өнер музейінде Алматы облысы, Қаскелен қаласындағы «Жас Қанат» балалар шығармашылық орталығының «Жаңа Қазақстан балалар көзқарасымен» атты көрмесі ашылды.
Бұл көрме Аrtsport бағдарламасы аясында балалардың шығармашылығына арналады. 2021 жылдың шілде айының басында «Жас Қанат» балалар шығармашылық орталығы Қаскелен қаласының балалары үшін есігін ашқан болатын. Шығармашылық орталықта бейнелеу, сәндік қолданбалы өнер, қолөнер, хореография, домбыра, вокал және актёрлік шеберлік сынды түрлі бағыттар бойынша 300-ге жуық бала білім алуда.
Экспозицияда 6 мен 14 жас аралығындағы 60-қа жуық жасөспірімдердің 100-ден астам кескіндеме, графика, қолданбалы өнері бойынша шығармашылық туындылары көрмеленген. Көрмеде балалар өз жұмыстарында туған жеріне, мәдениетіне, салт-дәстүріне деген сүйіспеншіліктері сезіледі. Әрбір туындының композициялық және колориттік шешімдері тақырыпқа сай тұтас бір үйлесілімділікті сездіртеді. Сонымен қатар, балалардың өнерге деген қызығушылықтары жан-жақты екенін көруге болады. Кейбір жұмыстарда әлемге белгілі суретшілердің әртүрлі жанрдағы туындыларын бейнелеген суреттерді көруге болады.
Көрменің мақсаты: жастардың мәдени дәстүрлері мен құндылықтарын сақтау және арттыруда бейнелеу өнері саласындағы балалар шығармашылығын дамытуға жәрдемдесу. Өскелең ұрпаққа заманауи өнердің мәдени құндылықтарын меңгерту болып табылады.
Кескіндеме өнерінде балалар әртүрлі стильдерді, әдіс-тәсілдерді қолданады және әртүлі жанрдағы шығармаларын салады.
Сәндік-қолданбалы өнерінде әртүрлі техникаларды, дизайн және безендіру әдістерін де көруге болады.
Қолөнер бұйымдарында заманауи тренд, бисер тігу қолданылады. Моншақтар, темір, сым және әртүрлі керек жарақтарды пайдалана отырып, екі және үш өлшемді компазициялардан құралған бұйымдарды көреміз.
Шығармаларда түс пен тондық контрасттардың мәнерлілігі сезіледі. Түстер палитрасының динамикасы және пішіндердің пластикалық байлығы байқалады.
«Жас Қанат» орталығының директоры Маметиязова Баян Абдуалиқызы, директор орынбасары Сабитова Ардақ Ташболатқызы, орталық әкімшілігі Опара Анастасия Петровна, сондай-ақ әр өнер саласы бойынша балаларға білім беріп, тәрбиелеп отырған: Ахаева Лаззат Маратқызы, Тагаева Айнұр Айдаралиқызы, Алишева Анар Мырзабекқызы, Ташкеева Талшын Серікқызы, Комекова Динара Джолдыбайқызы, Айниязова Гаухар Утегенқызы, Еркінов Султан Нұрдаулетұлы, Сатыпалды Гаухар, Мырзагалиева Мария және т.б. орталықтың ұстаздары бір жарым жылдың ішінде балаларға арналған республикалық, халықаралық байқауларға қатысып, жүлделі орындарға ие болды. Сонымен қатар, ұстаздар ерен еңбектері үшін төс бергелерімен марапаталды.
Көрме жетекшісі: Жуваниязова Гулнар,
Әбілхан Қастеев ат. ҚР МӨМ-нің «Педагогика және жобалау қызметі» бөлімінің жетекшісі
