2024 жылғы 8 қазанда сағат 16:00-де Әбілхан Қастеев атындағы Қазақстан Республикасының Мемлекеттік өнер музейінде Қазақстанның Халық суретшісі Мәмбеев Сабыр Әбдірасылұлының (1928-2017) «ШЕБЕРДІҢ КЕСКІНДЕМЕСІНДЕГІ ПОРТРЕТ» атты жеке көрмесінің ашылуы өтеді. Экспозицияда суретшінің отбасы қорындағы жиырмадан астам кескіндемелік туындылары қойылады.
Қазақстанның Халық суретшісі Мәмбеев Сабыр Әбдірасылұлы Қазақстан бейнелеу өнеріндегі 1950 жылдардағы буын өкілі. Сол жылдары қазақ бейнелеу өнерінің өрлеуі Мәскеу, Ленинград, Харьков, Киев қалаларында көркемөнер жоғарғы оқу орындарында білім алған К. Тельжанов, М. Кенбаев, Г. Исмаилова, А. Ғалымбаева, К. Шаяхметов, С. Мәмбеев және т.б. дарынды суретшілердің келуімен байланысты болды. Кәсіби білім алып келген қазақ суретшілері бейнелеу өнеріне жаңаша үн қосты. Кескіндеме сурет салу тәсілдері дәстүрлі рухани-көркем құндылықтарымен байытылып, суретшінің шығармашылығы ұлттық колоритпен жаңғыртылды. Сабыр Мәмбеев бейнелеу өнерінде ұлттық кескіндеме тілі мен өзіндік мәнерін табу жолдарымен айналысқан алғашқы қазақ суретшілерінің бірі болды. Биылғы көрме суретшінің шығармашылығындағы портрет жанрына арналады. Бұл туындылардың арасында көрермендер назарына алғаш рет ұсынылып отырған жұмыстар да бар.
Сабыр Әбдірасылұлы Мәмбеев 1928 жылдың 1 мамырында Оңтүстік Қазақстан облысы, Келес ауданының Абай-Базар ауылында дүниеге келді. 1946 жылы Алматы көркемөнер училищесін, 1953 жылы КСРО КА И.Е. Репин атындағы Ленинград кескіндеме, мүсін және сәулет институтын тәмамдады. 1953-1956 Н.В. Гоголь атындағы Алматы көркемөнер училищесінде сабақ берді. 1963 жылы «Қазақ КСР-нің өнеріне еңбек сіңірген қайраткері» атағын алды. 1978 жылы «Халықтар Достығы» орденімен марапатталды. 1980 жылы «Қазақ КСР Халық суретшісі» атанды. 1980 жылы Қазақ КСР Жоғарғы Кеңесінің депутаты болып сайланды. 1988 жылы бейнелеу өнерінің дамуына қосқан үлесі үшін, «Еңбек Қызыл Ту» орденімен марапатталды. Бірнеше рет: 1956-1959 (ҚСО IV Сьезі), 1959-1962 (ҚСО V Сьезі), 1968-1973 (ҚСО VІІІ Сьезі), 1973-1977 (ҚСО ІХ Сьезі) 1977-1982 (СО Х Сьезі) жылдарда Қазақстан Суретшілер Одағының төрағасы болып сайланды.
Көрме 2024 жылдың 27 қазанына дейін жалғасады
Көрме жетекшісі: Л. Әбілдаева
«Қазақстан бейнелеу өнері» бөлімінің
аға ғылыми қызметкері
