2025 жылдың 21 қаңтары сағат 16.00-де Әбілхан Қастеев атындағы Қазақстан Республикасы Мемлекеттік өнер музейінде Алекс Сорбонның «Жарық жауынгері. Жетістікке жету жолы» атты жеке көрмесінің ашылуы өтеді. Экспозицияға VII ғасырда император ТЕНДЗЁ сарайында Жапон шеберлерінен басталған АРАРЭ және МАКИ-Э техникасында орындалған 30-ға жуық панно қойылады.
Алекс Сорбонн — суретші, дизайнер және мүсінші, Арарэ мен Маки-Э жапондық зергерлік әшекейлеу техникасының шебері ретінде танымал. Оның туындылары әлемнің сегіз еліндегі жеке коллекциялардың ажырамас бөлігіне айналды. Жұмыстары голливуд актері Марк Дакаскос, Rammstein және The Prodigy музыкалық топтарының коллекцияларында бар.
Арарэ мен Маки-Э техникасы XVII ғасырда Жапонияда кеңінен қолданыла бастады. Арарэ (Arare) жапон тілінен аударғанда «бұршақ» дегенді білдіреді. Бұл — бояу микротамшыларын қолдану арқылы жасалатын күрделі процесс. Аталмыш әдіс ерекше текстураны жасай отырып жаңбыр немесе бұршақ тамшыларын визуалды еске түсіреді. Арарэ техникасы туындыларға тереңдік пен нәзіктік сыйлап, бейнені жандандырады.
Маки-Э (Maki-e) - лак пен пигменттерді пайдаланып өрнектер салу өнері. Дәстүрлі техникада шеберлер алтын, күміс және түрлі-түсті ұнтақтарды қолдану арқылы көлемділік пен жарқырап тұрған сәулелер әсерін береді.
Алекс Сорбонн аталмыш техникалар мен авторлық әдістерді біріктіре отырып, дәстүр мен заманауилықтың тамаша үйлесімін көрермен назарына ұсынады. Суретшінің картиналары бояу микротамшыларын қабаттап жағу арқылы жасалады, бұл әр шығарманы қайталанбас етеді. Мұндай тәсіл статикалық бейнелерде «қозғалыс» сезімін тудырып, көрерменнің эмоциясын оятады.
«Менің міндетім — көрерменге өз картиналарымдағы қимылдың тоқтап қалған сәтін сезіндіру арқылы сол бейненің қозғалысын өз сезімдері мен қиялы арқылы жалғастыруға мүмкіндік беру», - деп атап өтеді көрменің авторы:
Алекс Сорбоннның туындылары Третьяков галереясын қоса алғанда, жетекші көрме алаңдарында ұсынылды. 2017 жылы Мәскеу халықаралық көрмесінің жеңімпазы атанып, оның өнері дәстүр, эмоция және инновация үйлесімінің куәсі екенін дәлелдеді.
Шебердің ұраны:«Бұл әлемді жарқын және әдемі ету, өйткені оның өнері — ең талғампаз көрермендер үшін махаббатпен жасалған».
Алекс Сорбоннның туындылары сұлулықты бағалайтын және өзін бірегей өнер туындыларымен қоршауға тырысатын адамдар үшін жасалған. Оның әрбір картинасы өнерге деген терең сүйіспеншілік пен әлемді жақсартуға деген ұмтылыстың нәтижесі.
Көрме 2025 жылдың 21 ақпанына дейін жалғасады.
Көрменің кураторы:
Айдымбаева А.А.,
«Шетел өнері» бөлімінің аға ғылыми қызметкері
