2025 жылғы 12 ақпанда Әбілхан Қастеев атындағы ҚР Мемлекеттік өнер музейінің Орталық көрме залында (Желтоксан 137) суретші Екатерина Терехованың «Көктем лебі келгенде» атты жеке көрмесі ашылады.
Көрмеде әсерлі пейзаждар, қанық натюрморттар, сондай-ақ a’la Prima стилінде орындалған «тірі» портреттер ұсынылады. Екатерина Терехованың кескіндемесі импрессионизм мен реализм элементтерін біріктіре отырып, бірегей визуалды әсерлер жасайды. Жас автордың әрбір шығармасы көрерменді қоршаған әлемнің жылуы мен шынайылығына терең бойлауға шақырады.
Суретшінің шығармашылығы – бұл айқын текстуралы әдісі, қанық кескіндеме мәнері, батыл түстер палитрасы мен реңктер ойыны, оның кейіпкерлерінің көпқырлы мінезін және табиғи бейнелердің тереңдігін жеткізуге мүмкіндік береді. Автор айналасындағы әлемнен шабыт алып, табиғаттың өткінші күйлері мен адамдардың эмоциялық толғаныстарын бейнелеуге ұмтылады. Оның жұмыстарында нәзік, мөлдір лирикалық көріністерден бастап, қозғалыс пен құштарлыққа толы қуатты, динамикалық экспрессивті композицияларға дейінгі әртүрлі бейнелерді көруге болады. Белгілі ресейлік өнертанушы, беделді галерея иесі Анна Багратуни Екатерина туралы өз баяндамасында былай деп жазған: «Балалардай пәк, қоршаған әлемді тікелей және тұтас қабылдаған суретшінің еңбектеріне қарап, еріксіз: «Адамдар, айналаңызға қараңыздаршы, сұлулық дәл жаныңызда» деп айтқыңыз келеді».
Екатерина Терехова 1997 жылы Мәскеуде дүниеге келген, қазіргі уақытта Алматыда тұрып, шығармашылықпен айналысады. Өз еңбектерінде ол кейіпкерлерінің тек сыртқы бейнесін ғана емес, олардың ішкі әлемін, эмоциялары мен ойларын жеткізуге ұмтылады. Суретшінің шығармашылығы дәстүрлі жанрларды, сонымен қатар эксперименттік бағыттарды да қамтиды, бұл оның әр көрмесін ерекше етеді. Ол станоктық кескіндемені О. Тансықбаев атындағы Алматы декоративті-қолданбалы өнер колледжінде, сондай-ақ Мәскеудегі 1905 жылы негізі қаланған Академиялық көркемсурет училищесінде оқыған. Қазіргі уақытта Екатерина Ресей мемлекеттік мамандандырылған өнер академиясында станоктық кескіндеме мамандығы бойынша бесінші курс студенті. Оның жұмыстары өнерсүйер қауым, соның ішінде шетелдік коллекционерлер мен дипломаттар тарапынан жоғары бағалануда.
Осы бірегей шығармаларды тамашалап, ойға шомуға және сәттің сұлулығын сезінуге мүмкіндік жіберіп алмаңыз. Көрме эстетикалық ләззат сыйлап қана қоймай, өнерге жаңа көзқараспен қарауға, жас суретшінің энергиясын сезінуге және жаңа көркемдік мағыналарды ашуға жол ашады.
Көрмені 2025 жылдың 6 наурызына дейін тамашалауға болады.
Жұмыс уақыты: 10-00-19-00. Демалыс күні: дүйсенбі
Көрме кураторы: Кусаинова Бибігүл
