2025 жылдың 12 қыркүйегінде сағат 16:00-де Әбілхан Қастеев атындағы Қазақстан Республикасының Ұлттық өнер музейінің Орталық көрме залында (Желтоқсан көшесі, 137) алматылық суретші Светлана Какоткинаның «Бір ғажап күн» атты көрмесінің ашылуы өтеді. Көрмеде автордың 80-ге жуық туындысы көпшілік назарына ұсынылады.
Светлана Какоткина Алматы қаласында дүниеге келген. Білімі бойынша – дизайнер, сәулетші. Бастапқы көркемдік білімін «Классикалық өнер гимназиясында» алған. 2002 жылы Қазақ бас сәулет-құрылыс академиясын «Дизайн» мамандығы бойынша тәмамдаған. Студенттік жылдарынан бастап түрлі байқаулар мен көрмелерге қатысып, шығармашылық белсенділік танытты.
Көрме «Күз», «Қыс», «Көктем», «Жаз» атты топтамалардан тұрады. Көрмеге қойылған жұмыстар біздің қаламыз бен оның төңірегіндегі серуендерден туындаған әсерлер негізінде дүниеге келген. Әрбір күннен, әрбір пленэрден шабыт алған суретші бұл көрмені жай ғана картиналар топтамасы емес, өз сезімдері мен бақылауларының тірі күнделігіне айналдырды. Әрбір кенеп – белгілі бір сәттің көрінісі іспетті: өзен үстін жапқан таңғы тұман, батып бара жатқан күннің төгілген алтын шапағы, шөп арасындағы көлеңкенің ойыны.
Суретшінің «импрессионизм» бағытына деген құштарлығы айқын көрінеді. Табиғаттан алған шабыты арқылы ол өз туындыларында еркіндікке ұмтылады. Бұл көрме – суретшінің шеберханасында да, далада да жасаған еңбегінің нәтижесі. Ол пленэрлерді ерекше жақсы көреді, себебі әрбір күн, желдің әр лебі, күннің әр сәулесі авторды терең жеке толғаныстарға жетелеп, табиғатпен үндескен әсерлі туындыларға шабыттандырады.
Авторды жазғы таулардағы серуендер, қала көшелері мен қысқы бейнелер ешқашан бейжай қалдырмайды. Осы әсерлер оның туындыларында жаңғырып, тіпті гүлдердің нәзік сұлулығын бейнелейтін натюрморттарда да айқын сезіледі.
Суретші «Бір ғажап күн» атты көрмесі арқылы көрермендерді серуеннің сиқырына бойлап, күннің жылуын сезінуге, гүл жайнаған даланың хош иісіне елітіп, табиғат әуенін тыңдауға шақырады.
Экспозиция 30 қыркүйекке дейін жалғасады.
Көрме кураторы – Айсұлу Үсентаева
