2025 жылдың 3 қазанында сағат 14:00-де Әбілхан Қастеев атындағы ҚР Ұлттық өнер музейінде Алматы қаласына «Әлемдік қолөнер қаласы» мәртебесінің берілуіне орай ұйымдастырылған ALA CRAFT 2025 халықаралық қолөнер фестивалі аясында «Көшпелі бағыттар. Аялдама – Алматы» атты халықаралық қолөнер көрмесінің салтанатты ашылуы өтеді.
Халықаралық қолөнер көрмесі – Қазақстан қолөнершілер одағы мен отандық шеберлердің шығармашылық жетістіктерін паш ететін өзіндік есеп беруі іспетті. Көрермендер халық шеберлерінің дәстүр мен қиял тоғысқан ғажайып әлеміне сапар шегеді. Көрменің негізін «Шебер» республикалық байқауы мен «ЮНЕСКО сапа белгісі» халықаралық байқауының жеңімпаздары ұсынған туындылар топтамасы құрайды. Бұл – жүзден астам бірегей шығарма. Көрмеде қазақтың дәстүрлі қолөнерінің сан қырлы үлгілерімен қатар, қазіргі заманғы сәндік-қолданбалы өнер туындылары да ұсынылған. Олардың қатарында киіз бұйымдары, зергерлік әшекейлер, біз кесте, керамика, ағаштан жасалған бұйымдар, металлды көркем өңдеу, тоқыма өнері және дәстүрлі ұлттық киімдер бар.
«Шебер» байқауы – 2006 жылдан бері «Шеврон» компаниясының бастамасымен жүзеге асып келе жатқан «Қазақстандағы қолөнер мен халық кәсіпшілігін жаңғырту» жобасының маңызды әрі ажырамас бөлігі.
Байқаудың негізгі мақсаты – республикадағы қолөнер өндірісін дамыту, ұмыт бола бастаған ұлттық сәндік-қолданбалы өнер түрлерін қайта жаңғырту, сондай-ақ Қазақстанның барлық өңірлеріндегі қолөнер шеберлеріне қолдау көрсету.
«Шебер» байқауының жүлде қоры – «Шеврон» компаниясы демеушілік көмек ретінде бөлген 10 миллион теңгені құрайды. Бұл қаражат байқау жеңімпаздарының қолөнер дәстүрі бай шет мемлекеттердің біріне оқу-тәжірибелік сапарын қаржыландыруға бағытталады. Бағдарлама аясында қатысушылар музейлерді, қолөнер орталықтарын, студиялар мен шеберханаларды аралап, мүмкіндігінше фестивальдерге де қатыса алады. Оқу сапарына қатысушылардың ұшу, тамақтану және тұрғын үй шығындары толықтай «Шеврон» компаниясының демеушілік көмегі есебінен өтеледі.
Ұйымдастырушылар – «Шеврон» компаниясымен серіктестіктегі Қазақстан қолөнершілер одағы және Әбілхан Қастеев атындағы ҚР Ұлттық өнер музейі. Байқау 15 жыл бойы Қазақстан қолөнершілер одағының төрағасы Айжан Бекқұлованың жетекшілігімен өткізіліп келеді. Айжан Бекқұлова – «Құрмет» орденінің иегері, WCC\APR-дің құрметті мүшесі әрі кеңесшісі, ЮНЕСКО және ИСЕСКО істері жөніндегі Қазақстан Республикасының Ұлттық комиссиясы жанынан материалдық емес мәдени мұраны қорғау жөніндегі ұлттық комитет мүшесі, сондай-ақ «Мәдениет саласының үздігі» төсбелгісінің иегері.
2025 жылы өтетін «Шебер» республикалық байқауының XII маусымын ұйымдастыруға Алматы қаласы әкімдігі (Туризм басқармасы) айрықша қолдау көрсетіп отыр. Байқау жеңімпаздарын марапаттау және нәтижелерін жариялау рәсімі AlaCraft қолөнер фестивалінің бір бөлігі ретінде 4 қазан күні Алматыдағы Абай алаңында өтеді.
2025 жылдың 4-5 қазанында Алматы қаласындағы Абай алаңында қалаға «Әлемдік қолөнер қаласы» мәртебесінің берілуіне орай ұйымдастырылған ALA CRAFT 2025 халықаралық қолөнер фестивалі өтеді. Бұл мәртебе – қазақстандық қолөнершілердің шеберлігін және алматылықтардың өз мәдени мұрасына деген терең сүйіспеншілігін мойындаудың айқын дәлелі.
Фестивальдің айрықша сәті – Алматы қаласына ресми түрде World Craft City (Әлемдік қолөнер қаласы) мәртебесін табыстау рәсімі. Бұл мәртебе – қаланың материалдық емес мәдени мұраны сақтауға және креативті экономиканы дамытуға қосқан үлесінің халықаралық деңгейде мойындалғанының айғағы.
Экспозиция 2025 жылғы 13 қазанға дейін музейдің фойесінде көпшілік назарына ұсынылады.
Көрме кураторы –
көрме мен экспозиция бөлімінің жетекшісі
Акилбекова А.Р.
