2025 жылдың 11 ақпан күні сағат 16.00-де Әбілхан Қастеев атындағы ҚР Мемлекеттік өнер музейінде Қазақстанның заманауи кескіндемешісі Оралбек Қабөкенің «QARA JER» атты жеке көрмесінің ашылу салтанаты өтеді.
Бұл көрме О. Қабоке үшін жады мен өткенді қайта қараудың ерекше алаңы болып табылады. Көрме идеялары оның жеке естеліктерінен бастау алады, бірақ олар жекелік шеңберден шығып, кең ауқымды тарихи және әлеуметтік мәселелерді зерттеуге бағытталған. Қылқалам шебері өзінің жұмыстары арқылы естеліктердің қалай сақталатынын, оны қайта қараудың күрделілігін, ұрпақтан ұрпаққа қалай берілетінін айтады. Уақыт өте келе олардың мағынасының қалай өзгеретінін зерттеп, көрерменді тереңірек түсінуге шақырып, естелік ұғымының көпқырлы табиғаты жайлы ойлануға шақырады.
Шығармалар әртүрлі медиа құралдары арқылы ұсынылған, олар жадының визуалды және материалдық аспектілерін зерттеуге мүмкіндік береді. Осылайша, көрме автордың жеке тәжірибесін кең әлеуметтік контекстпен байланыстырады.
Ішіндегі маңыздысы «Әкемнің бейнесі» атты портреті. Сағыныш пен мұңға толы бұл объект экспозицияның кеңістігінен ауқымды орын алады. Яғни, портрет құрбандыққа арналған қойдың басы бейнесімен, топырақ үйінділерінен құралған қабір инсталляциясымен және автордың перформансымен жалғасын табады.
Осы кезеңде жазылған шығармалар суреттегі қара өткір контурмен ерекшеленеді. Суретші шығармашылық жолында реализм, натурализм, кубизм, сюрреализм, символизм, метамодернизм сынды түрлі бағыттарды үнемі зерттеумен қатар, біршама ізденістер жасайды. Нәтижесінде, оның монументалды кенептерінде сары, қызыл, сұр, көк түстердің аясында орналасқан, денелердің пішінін сындыра өтетін қара жиектер легі пайда болған.
Ол өз тақырыптарында философиялық көзқарастарын іштей саралайды. «Ақ» атты ақ-қара және сары реңктердің үйлесімінде жазылған туындысында адамның жарық дүниеге келгеннен өлімге дейінгі кезеңдерді жалпылай қарастырады. Оның ішінде болмыс заңдылықтары, көне ғұрыптар, ғасырлар тоғысындағы сыннан өткен қарым-қатынастар, адам жан-дүниесінің түрлі құбылысы сынды иірімдер кіреді.
Ал «Патшаның ұлы» атты туындысында Інжіл түсінігі бойынша наным сенімдерге жүгініп, басты кейіпкердің жер бетіндегі миссиясын көрсетеді. Аталмыш тақырыптарға тоқталуының себебі жүрекке дауа, санаға өріс іздеп, рухани жетілуге жетелейтін мәңгілік құндылықтардың маңызын ашуға ұмтылады.
Оралбек «Аян» атты кескіндемесін графикалық мәнерде жазып сұрғылт-көгілдір реңдермен орындайды. Бұл автордың түсінде көрген бұлыңғыр оқиғасынан үзінді. Оны екі адамның күрделі ракустарымен шешеді. Суретші өзіне келген жайсыз аяндардан кейін, шынайы өмірдегі басынан кешкен қатерлі жағдайларды іштей есіне сақтап қалғандығын баяндайды.
«Тар бөлме» атты композициясында суретші өзіне тән техниканы қолданады – кенептің жазықтығын тар бөлменің кеңістігіне айналдырып, бір отбасының мүшелерін өрнектеп жайғастырады. Мұнда суретші көрерменге қазіргі әлемде өмір сүретін адамдар үнемі әлеуметтік және материалдық қиындықтарға тап болатындығы туралы сыр шертеді.
Оралбек Қабөке 1987 жылы ҚХР-да Алтай қаласында дүниеге келді. 2011 жылы Т. Жүргенов атындағы Қазақ ұлттық өнер академиясын тәмәмдады. Қылқалам шебері Жұмақын Қайрамбаев шеберханасында білім алды. Көптеген республикалық және халықаралық көрмелерге қатысушы. 2013 жылдан бері ҚР Суретшілер одағының мүшесі. Ол өзінің тың тақырыптағы кескіндемелерімен біраз жеке көрмелерін өткізіп, заманауи бейнелеу өнерінде белсенді, әрі танымал суретшілердің біріне айналды.
Экспозиция наурыз айының 5-не дейін жалғасады.
Көрме жетекшілері:
өнертанушы – Сандуғаш Мырзабекова
суретші – Сырлыбек Бекботаев
