2025 жылдың 18 маусым күні сағат 16:00-де Әбілхан Қастеев атындағы ҚР Мемлекеттік өнер музейінде қазақстандық суретші Нэлли Бубэнің «Мәдениет диалогы. Шығыс - Батыс» атты жеке мерейтойлық көрмесінің ашылуы өтеді.
«Мәдениет диалогы. Шығыс - Батыс» көрмесі - қазақстандық суретшінің жарты ғасырдан астам шығармашылық жолын қамтитын ауқымды өнер жобасы. Экспозицияда кескіндеме, графика, коллаждар, объектілер мен станоктық туындылар ұсынылған. Барлық жұмыстарды өркениеттер, ұрпақтар және уақыт арасындағы үздіксіз диалог идеясы біріктіреді.
Көрмеге 80-нен астам шығарма қойылған. Автордың туындыларында үш негізгі тақырыптық желі анық байқалады: мәдени сабақтастық, экологиялық мәселелер және метафоралық тереңдік пен пластикалық көркемдікке толы Киелі кітап желілері. Барлық шығармалар авторлық орындау техникасында орындалған.
Нэлли Бубэ үшін «Шығыс - Батыс» – көпір емес, бір кеңістікте қатар өмір сүру ұғымы. Ұлы Жібек жолына арналған серия - географиялық карта емес, мәдени алмасу туралы поэтикалық шығарма, Еуропа, Азия мен Қытай халықтарының бейбіт бірлесе өмір сүру рухын жырлайтын көркем туынды. Символдық бейнелер мен композициялық шешімдерден бостандық идеясы мен рухани тәжірибенің ортақ табиғаты айқын сезіледі. Бұл тақырыптың көркемдік тұрғыдан ең мәнерлі шешімін табуға суретші 2002 жылдан бері шығармашылық ізденіс жүргізіп келеді. Аталмыш көрмеде «Ұлы Жібек жолының» бірнеше авторлық нұсқасының ішінен екі жұмысы ұсынылып отыр.
Одан бөлек, экспозицияда түркі халықтарының мәдени және рухани құндылықтарына арналған шығармалар да бар. «Сәукеле» композициясында онтологиялық үшқабатты әлем - жер асты, жер беті және аспан - архаикалық бас киімнің пішінінде тоғысып, болмыстың әмбебап моделіне айналады. «Қонақжайлық» атты туындыда үлкен қазан бейнеленген; оның айналасында қонақтар әңгімелесіп, той иелері мен қожайындар мерекелік әзірлік үстінде отырған сәтін көреміз. Бұл туындыда қазан - көшпелі өмір салтының ең асыл қонақжайлық дәстүрлерінің ғана емес, Қазақстанды мекендейтін халықтардың бірлігі мен ынтымағының да символы ретінде көрініс табады. «Қобыз» - қазақ музыкалық мәдениетінің нышаны, авторлық абстрактілі стилінде бейнеленген. «Қазақ қызы» портреті - көшпенді әйелдің жинақталған, символикалық бейнесі. Сондай-ақ көрмеде «Көпқырлы Азия» атты диптих қойылған. Онда Қазақстанды мекендейтін сан алуан ұлт өкілдерінің бейнелері топтастырылған. Бұл тақырып – автордың көп жылдан бергі шығармашылық қызығушылығының арқауында дамып келе жатқан бағыттарының бірі, ол көптеген портреттік нобайларда да ерекше көрінісін тапқан.
Экология тақырыбына арналған цикл - бұл планетаның жойылуына қарсы көркемдік үндеу. Экологиялық ескерту - нағыз көркемдік айқай! Сымдарға оратылған, металл үйінділеріне шырмалған, гипертрофияланған жануарлар бейнесі көрерменнің санасында өшпес әсер қалдырады. Суретші нақты заттармен - металл сынықтарымен, бұрандалармен, маталармен жұмыс істей отырып, техногендік қалдықтарды табиғаттың жоғалуы туралы метафизикалық пайымға айналдырады. Осы кезеңге жататын бірқатар туынды көрмеге енгізілген. Оның ішінде «Жалғыз құстың ұясы», «Жаңа ай» жұмыстары бар. Экологиялық циклдегі бұл жұмыстар кенепте акрил және май пастелімен орындалған, табиғаты жағынан түрлі түсті графикаға жатады.
Табиғатқа ұқыпты, жанашырлықпен қарауға үндеу – авторды көп жылдан бері толғандырып келе жатқан тақырып. Бұл қызығушылық алғаш рет 1997 жылы «Ұлар» галереясында өткен жеке көрмесінен бастау алған.
2019 жылы Солтүстік Кипр аумағындағы Никосия қаласында өткен симпозиумға қатысу барысында Нэлли Бубэ экологиялық тақырыпқа арналған 30 туынды жазды. Бүгінде бұл цикл Никосиядағы Биология және табиғаттану музейінің кеңістігін безендіріп тұр. Экологиялық тақырып әлі де өзектілігін жоғалтқан жоқ.
Экспозицияда ерекше орын алатын бөлімнің бірі - Інжілдегі астарлы әңгімелер мен Ескі Өсиет сюжеттеріне арналған цикл. Бұл топтамадағы жұмыстарға суретші 1999 жылдан бері ден қойып келеді. Оның Інжіл тақырыбына арналған туындылары дәстүрлі канондық емес, шығыстық интерпретациясымен ерекшеленеді. Иса пайғамбар, пайғамбарлар мен елшілер – барлығы Орталық Азияға тән маталармен көмкерілген, өңірлік рәміздермен толықтырылған бейнеде ұсынылады. Мұндай көркемдік шешім бұл бейнелерді қазақ көрерменіне жақын әрі түсінікті етіп қана қоймай, оларды әмбебап деңгейге көтереді, өйткені рухани ақиқат географиялық шекараға бағынбайды. Суретшінің бұл циклдегі еңбектері Осло, Кристиансанн, Берген қалаларында көрмеге қойылып, халықаралық коллекциялар құрамына енген.
Сондай-ақ, көрмеде автордың ертеректегі кезеңдегі суреттері, нобайлары мен кітап иллюстрациялары да көрермен назарына ұсынылған.
Нэлли Бубэнің шығармашылығы – тірі, үнемі жаңарып, дамып отыратын форма; ол қоршаған дүниені қабылдап, онымен сұхбаттасып, көрерменге шабыт сыйлайтын қуатты көркемдік құбылыс. Оның картиналарынан көшпелі дәстүрлердің жаңғырығы, заманауи әлемнің алаңдаушылықтары мен рухани тепе-теңдікке ұмтылыс айқын сезіледі. Автор үшін «мәдениеттер диалогы» - бұл жай ғана риторикалық ұғым емес, көрерменді терең ойға жетелейтін өнер. Нэлли Бубэ жазып қана қоймайды, ол біздің әлеммен, болашақпен және әрқайсымызбен сұхбат құратын суретші.
Нэлли Витальевна Бубэ - Қазақстан Республикасының еңбек сіңірген мәдениет қайраткері, Қазақстан Республикасы Суретшілер одағының және Қазақстан Республикасы Өнер академиясының мүшесі, Ресей Өнер академиясының құрметті шетелдік мүшесі. Нэлли Бубэ 1949 жылы Қарағанды қаласында дүниеге келген. 1969 жылы Н.В. Гоголь атындағы Алматы көркемсурет училищесін, 1977 жылы Абай атындағы Қазақ педагогикалық институтының көркемсурет-графика факултетін тәмамдаған. Суретші көптеген қалалық, республикалық, халықаралық және жеке көрмелерге қатысқан.
Экспозиция 2025 жылдың 11 шілдесіне дейін жалғасады.
Көрме кураторлары - Ақылбекова А., Көпжүрсін А.
