2025 жылдың 3 шілдесінде сағат 16:00-де Әбілхан Қастеев атындағы ҚР Мемлекеттік өнер музейінде қазақстандық суретші Сәкен Бектиярдың «Келте Алтын Ғасыр» атты жеке көрмесінің салтанатты ашылуы өтеді.
«Келте Алтын Ғасыр» көрмесі – ұлттық көркем мәдениетті толықтыратын маңызды оқиға. Бұл көрме – бірнеше онжылдыққа созылған шығармашылық ізденістің, ішкі толғаныс пен көркемдік тәжірибенің нәтижесі. Көрмеде суретшінің ойлау тәсілі мен көркемдік тілін жақынырақ тануға болады. Бұл жай ғана ретроспектива емес – бұл уақыт, тағдыр, тән мен сызық туралы философиялық толғаныс. Сәкен Бектияр үшін сызық – даланың тынысы мен үні іспетті, сондықтан болар ол өз қолтаңбасын «графиканың музыкасы» деп атайды, ол.
Суретші графика, кескіндеме және иллюстрация саласында еңбек етеді, визуалды медианы поэтикалық және музыкалық ойлау тәсілдерімен ұштастырады. Оның көркемдік тілі дәстүрлі академиялық мектептен тыс дамығанымен, суретші пластика мен композицияны нәзік сезіну арқылы пішінге ішкі серпін мен ырғақ дарыта алады.
Экспозицияға ірі форматты кескіндемелермен қатар, тушпен және қарындашпен орындалған нәзік графикалық парақтар да енген. «Қыз қуу немесе жергілікті махаббат мерекесі», «Қара аққу», «Күміс сырғалы қазақ қызы» секілді серияларында дала мәдениетіне терең тамыр жайған халықтық архетиптер мен мотивтер көрініс тауып, бүгінгі заман тұрғысынан жаңаша пайымдалады. Соңғы жылдары салынған «Шеңбер немесе үйлесімге ұмтылыс», «Атқамінер және оның олжасы» атты картиналарда суретші ұжымдық бейсаналық пен далалық визуалды жадыға жүгінеді.
Түстік палитрасы қанық қара және охра түстерінен бастап, ашық сұр мен бозғылт қызғылт реңктерге дейін алмасып отырады. Бұл түстер – суретшінің сезімді жеткізу амалы, сипаттаудан гөрі ықпал ету құралына айналған. Өнертанушы Надежда Полонская суретші жайлы: «Оның сурет салғаны – ән айтқандай, ал ән салғаны – тыныс алғандай... Мұны көру керек, сөзбен жеткізу қиын», – дейді.
Сәкен Бектияр, Kenbee лақап атымен де танымал. Ол Алматыдағы «Tengry Umai» галереясындағы жеке көрмесінен бастап, Германия, Испания, Черногория және Ұлыбританиядағы (соның ішінде Лондондағы Victoria and Albert музейінде) көптеген халықаралық жобалар мен арт-резиденциялардың қатысушысы. Бүгінде суретшінің туындылары әлемнің түрлі елдеріндегі жеке коллекцияларда сақтаулы.
Әбілхан Қастеев атындағы ҚР Мемлекеттік өнер музейінде өтетін бұл көрме 2000 жылдары бастау алған «Келте Алтын Ғасыр» сериясының маңызды белесі болып, тұтас бір көркемдік топтама ретінде жалғасын таппақ.
Экспозиция тамыз айының 1-не дейін жалғасады.
Көрме жетекшісі - Сырғабаев С.Б.,
«Қазақстан бейнелеу өнері» бөлімінің ғылыми қызметкері
