2025 жылдың 8 шілдесінде Әбілхан Қастеев атындағы ҚР Мемлекеттік өнер музейінің Орталық көрме залында Нұрлан Темірбекұлы Жайнақбаевтың «Шектеусіз шығармашылық. Next.» атты жеке көрмесі ашылады.
Нұрлан Темірбекұлы Жайнақбаев 1963 жылы дүниеге келген. Негізгі мамандығы бойынша Нұрлан Темірбекұлы – хирург-дәрігер, профессор, медицина ғылымдарының докторы. Оның ғылыми еңбектері тоғыз монографияда, он оқу-әдістемелік құралда және жүз отыздан астам ғылыми басылымдарда көрініс тапқан. Зерттеу нәтижелері зияткерлік меншік тұрғысынан да жоғары бағаланып, 14 авторлық куәлік, сондай-ақ медицина мамандарына арналған 4 анықтамалық, 5 патент (оның ішінде екі Еуразиялық куәлік) түрінде рәсімделген.
Нұрлан Жайнақбаевтың Қазақстан Республикасының медицина және қоғамдық денсаулық сақтау саласын дамытуға қосқан елеулі үлесі мемлекеттік және мекемелік марапаттармен жоғары бағаланған. Ол «Қазақстанның еңбек сіңірген қайраткері» құрметті атағына, «Құрмет» орденіне және «Денсаулық сақтау ісінің үздігі» төсбелгісіне ие болған.
2015 жылы ғалымның еңбегі халықаралық деңгейде мойындалып, Оксфорд академиясы тағайындаған «Жыл ғалымы» марапатының («Social Sciences» саласы, «Mobile Medicine» бағыты бойынша) лауреаты атанды.
2025 жылы медициналық кадрларды даярлау ісіне сіңірген еңбегі мен оқыту үдерісіне инновациялық технологияларды енгізгені үшін «Парасат» орденімен марапатталды.
Немістің әйгілі жазушысы Лион Фейхтвангер: «Талантты адам – барлық салада талантты», – деген екен. Бұл сөздердің растығына Нұрланның екінші жеке көрмесін тамашалау арқылы көз жеткізе аласыз. Өмірінің басым бөлігін медицина саласына арнаған Нұрлан соңғы жылдары бейнелеу өнерінің сырлы әлеміне қадам басып, шығармашылықтың жаңа белесіне шықты. Ғалымға тән тиянақтылықпен ол бұл салаға да терең ізденіспен әрі жүйелі түрде бет бұрды. 2021 жылы Нұрлан Темірбекұлы Абай атындағы Қазақ ұлттық университетін «Бейнелеу өнері» мамандығы бойынша аяқтады.
2024 жылы Нұрлан И.Е. Репин атындағы Санкт-Петербург көркемөнер академиясының магистранты атанды. Ол «Бейнелеу өнері» бағытында дәрігерлерді даярлау жобасының бастамашысы (2023 жылғы 6 қазандағы №39475 авторлық куәлік). Бұл бастаманың негізгі мақсаты – медициналық білім беру үдерісіне бейнелеу өнерін енгізу арқылы адам анатомиясы мен физиологиясын оқытуды көрнекі және тиімді ету.
«Шектеусіз шығармашылық. Next.» көрмесі – автордың ішкі түйсігі мен көркемдік көзқарасы арқылы қазақстандық табиғат бейнелеріне құрылған визуалды саяхат. Көрмеде сан алуан тақырыптар тоғысады: қатал да кең дала, асқақ та салтанатты таулар, нәзік натюрморттар мен гүл көмкерген алқаптардың поэтикалық көріністері. Нұрлан табиғаттың тынысын, ландшафтың ішкі қуатын нәзік сезіне біледі. Оның бояу палитрасы – жарқын, көркем, алайда асау емес. Әрбір туындысы туған жердің жарығы мен ауасын бойына сіңіргендей әсер қалдырады. Әсіресе, тау өзендері бойындағы қарағайлар, қызылкүрең көкнәр көмкерген кең дала мен кешкі аспан бейнеленген пейзаждар ерекше көркемдікпен көз тартады. Бұл туындылардан қазақ кескіндеме мектебінің дәстүрі мен еуропалық пленэрлік бағыттың әсері қатар сезіледі.
Жанрлық тұрғыдан көрме үш мағыналық бөлімге бөлінеді:
Пейзаждар – табиғатпен байланыс формасы ретінде. Тау жоталары, күн батар шақтар, ормандар мен жазықтар кеңістіктің еркін рухын және байыппен бақылаудан туатын тыныштықты бейнелейді.
Натюрморт – уақыттың тұрақтылығының символы. Алмалар мен гүлдер қарапайым дүниеден табылатын сұлулық пен өмірге толы бір сәттің қадірін сезіндіреді.
Кеңістіктегі тұлға – жағалауда оңаша тұрған адамның бейнесі ішкі ізденіс пен толғаныстың, жарық пен көлеңкенің арасында өмір сүрудің метафорасы іспеттес.
Бұл көрме – туған жерге, жарық пен адамға деген сүйіспеншіліктің шынайы көрінісі. Майлы бояудың толқынды іздері көрерменді тек бақылап қана қоймай, сезінуге, тыңдауға, кенеппен бірге тыныстауға жетелейді.
Көрме 2025 жылдың 8 тамызына дейін жалғасады.
Жұмыс уақыты: 10:00 – 19:00. Демалыс күні: дүйсенбі
Куратор: Ақылбекова А.Р.
