2025 жылдың 11 шілдесінде сағат 16:00-де Әбілхан Қастеев атындағы ҚР Мемлекеттік өнер музейінде көрнекті қазақстандық суретші Ибрагим Кубековты (1957-2025) еске алуға арналған көрменің ашылуы өтеді. Көрмеде автордың графика және кескіндеме жанрларында орындалған елуге жуық туындысы ұсынылады.
Ретроспективті көрме көрерменді өмірдің қарапайым сәттерінен-ақ сан алуан сезім мен терең мағына таба білген талантты шебердің шығармашылығымен таныстырады. Көрме бүкіл ғұмырын өнерге қызмет етуге арнаған тамаша суретші әрі асыл жанның жарқын рухына тағзым ретінде ұйымдастырылып отыр.
Ибрагим Кубеков 1957 жылы Украина КСР-інің Ворошиловград қаласында дүниеге келген. Үш жасында ата-анасымен бірге Алматыға қоныс аударған. 1978-1982 жылдары Абай атындағы ҚазПИ-дің көркемсурет-графика факультетінде білім алған. 1999 жылы ол Алматы облысының Есік қаласында Қазақстандағы алғашқы тәуелсіз апталық аудандық басылым - «Есік» газетінің негізін қалады. Бұл басылымға биыл 24 жыл толып отыр. Ибрагим Кубеков - бүкілодақтық және халықаралық карикатура байқауларының қатысушысы әрі жүлдегері. Оның туындылары әр жылдары өңірлік және халықаралық көрмелерде ұсынылып, республикалық және бүкілодақтық басылымдарда жарияланған. Ибрагим Кубеков 1980-жылдардың соңынан бастап, шамамен қырық жыл бойы газет графикасы саласында еңбек етіп, «Дружные ребята», «Караван», «Мегаполис», «Ковчег», «Информбюро» сияқты басылымдарға шарждар мен карикатуралар әзірледі. Соңғы жылдары суретші толығымен станоктық кескіндеме мен графикаға бет бұрған еді.
Ибрагим Кубековтың шығармашылығындағы басты тақырыптардың бірі – адамдардың, әсіресе ер мен әйелдің өзара қарым-қатынасы. Оның туындыларына жеңіл ирония және автор мен кейіпкерлері арасындағы нәзік эмоциялық үндестік тән. Бұл жұмыстардан өмірдің тірі лебі, сезімдердің нәзік те шынайы тебіренісі, егжей-тегжейге мән беру, қарапайым адамға деген ілтипат пен замандастың тұрмыс-тіршілігіне деген ынта-ықылас анық сезіледі. Сырт көзге қарапайым көрінетін тақырыптардың өзінен-ақ суретші сан түрлі оқиға желісін, олардың терең мағыналық қырларын, көркем бейнелер мен өмірлік жағдайларды танып, шеберлікпен бейнелей білді. Көрмеге «Қалалық хикаялар» (2024), «Қара дос» (2024), «Көне дәуірлердің құдайлары мен мифтері» (2024) сынды графикалық топтамалар енгізілген. Сондай-ақ суретшінің кескіндемелік туындылары да көрермен назарына ұсынылады. Ибрагим Кубеков үнемі шығармашылық ізденісте жүріп, түрлі материалдармен еркін тәжірибе жасаған. Алайда ол үшін техникалық шеберліктен гөрі туындының тақырыбы, сюжеттік желісі, адам бейнесінің даралығы, кейіпкердің мінезі мен көңіл-күйін дәл жеткізу маңызды еді. Суретшінің еңбектері мазмұндық жағынан жарқын, өмірге құштар, кейде астарлы әзіл мен иронияға толы. Бірақ ең бастысы - олар көрерменді адамның ішкі жан-дүниесіне, терең рухани әлеміне жетелейді.
Биылғы жылдың маусым айының басында көрнекті суретші Ибрагим Кубеков өмірден озды. Ол бізге ғажайып көркем туындыларын мұра етіп қалдырды. Абзал азамат, талантты суретші Ибрагим Кубековтың жарқын бейнесі жүрегімізде ұзақ сақталады. Оның бай шығармашылық мұрасы Қазақстан бейнелеу өнерінің тарихынан өзіне лайықты орнын алары сөзсіз.
Көрме шілде айының 20-на дейін жалғасады.
Көрме жетекшісі - Амир Жадайбаев, Өнертану кандидаты,
жетекші ғылыми қызметкер
