2025 жылдың 10 шілдесі күні сағат 16:00-де Әбілхан Қастеев атындағы Қазақстан Республикасының Мемлекеттік өнер музейінің Орталық көрме залында Узбаева Майра Ізкенқызының «Ізкеннің арманы» атты жеке көрмесінің ашылуы өтеді. Көрмеде автордың 21 туындысы ұсынылады.
Узбаева Майра Ізкенқызы 1972 жылы 1 сәуірде Тараз қаласында дүниеге келген. Өнерге деген қызығушылығы бала кезінен басталып, 1984 жылы Мемлекеттік көркемсурет мектебіне қабылданған сәттен бастап одан әрі шыңдала түсті. Мектепте композиция, сурет, кескіндеме, мүсін және өнер тарихы пәндерін меңгерді. Пленэрлік жұмыстарға қатысып, түрлі байқауларда өнерін танытты.
1989 жылы Жамбыл педагогикалық институтының Бейнелеу өнері және сызу факультетіне түсіп, кәсіби білім алды. Студент кезінде пастель, көмір, майлы бояу, акрил және акварель техникасында жұмыс істеді.
1994 жылдан бастап Тараз қаласының мектептерінде Бейнелеу өнері, Сызу, Технология пәндерінен сабақ беріп, оқушыларды шығармашылыққа баулыды. Тараздың 2000 жылдығына орай папье-маше техникасында көне ыдыстар мен шағын қалашықтар жасап, көрмелер ұйымдастырды.
2012 жылы Тараз Ғасыр колледжінде еңбек етіп, кілем тоқу, гобелен жасау бағытында жұмыс істеді. Кейін Қаскелең мен Алматы қалаларында өнер пәнінен сабақ беріп, оқушыларды шығармашылық дағдыларын дамытуға ынталандырды.
Суретшінің өнер жолындағы алғашқы қадамын жасауына ықпал еткен - оның әкесі. Балалық шағында суретке деген махаббаты мен қызығушылығын оятып, әрдайым қолдау көрсеткен әкесі автордың басты шабыт көздерінің біріне айналды. Сондықтан бұл көрме суретші үшін ерекше маңызға ие.
Экспозицияда автордың кескіндеме, графика және акварель техникасында орындалған туындылары ұсынылады. Табиғат көріністері, гүлдер мен заттық әлемнің көркем бейнелері нәзік бояу үндестігімен және ұлттық рухпен үйлесіп, көрерменді сұлулық пен үйлесім әлеміне жетелейді.
Пейзаждарында суретші табиғаттың көркемдігін, мезгілдердің ауысуын, жарық пен кеңістікті шебер бейнелейді. Әр туындыдан нәзік сезім мен өмірге деген сүйіспеншілік аңғарылады.
Қазіргі уақытта суретші балалар шығармашылығы орталығында еңбек етіп, кәсіби шеберлігін шыңдай түсуде. Сонымен қатар, республикалық және халықаралық көрмелерге белсене қатысып, өз тәжірибесін жас ұрпақпен бөлісіп, оларды өнерге баулуда.
Узбаева Майра Ізкенқызы қатысқан көрмелері:
«Әйел әлемі» көрме-фестивалі, Алматы, ҚР Орталық Мемлекеттік музейі, 2022, «Времена года» халықаралық конкурс, Кричев, Беларусь, 2023, «Күзгі симфония» пленэрі, Алматы, 12.11.2023, «Жетісу өнері» көрмесі, Талдықорған, 2023, «Бәйшешектер гүлденгенде» көрмесі, Алматы, 19.04.2024, «Қуаныштың көк түсі» көрмесі, Алматы, 04.05.2024, «Өнерлі ұстаз - ұлт болашағы» көрмесі, Алматы, 2024, «Ә. Қастеевтің туғанына 120 жылдық» халықаралық конкурс, Алматы, 2024, «15 шілде - Демократия және Ұлттық Бірлік күні» көрмесі, Анталия (Түркия), 2024, «Круги на воде» көрмесі, Алматы, ҚР Орталық Мемлекеттік музейі, 01.05.2025, «Алматы дарыны» алғыс хаты, Алматы, 2024,«Весенние краски Наурыза» көрмесі, Әбілхан Қастеев атындағы Қазақстан Республикасының Ұлттық өнер музейі, Алматы, 10-22.04.2025,«Акварельды фреш» көрмесі, Алматы, ҚР Орталық Мемлекеттік музейі, 2025, «Наурыз нақыштары» көрмесі, Алматы, ҚР Орталық Мемлекеттік музейі, 2025, «Судағы шеңберлер» көрмесі, Алматы, ҚР Орталық Мемлекеттік музейі, 2025.
Көрме 2025 жылдың 24 шілдесіне дейін жалғасады.
Жұмыс уақыты: 10.00 - 19.00.
Демалыс күні: дүйсенбі
Куратор: Серікбай Меруерт Балқыбекқызы
