2025 жылдың 13 мамырында сағат 16:00-де Әбілхан Қастеев атындағы ҚР Мемлекеттік өнер музейінің Орталық көрме залында Светлана Александровна Полянскаяның «Көңіл күй симфониясы» атты жеке көрмесінің ашылуы өтеді. Экспозицияға 60-тан астам кескіндеме және графика туындылары қойылады.

Светлана Полянская Алматы қаласында дүниеге келген. Ол 76 жасында шығармашылыққа шын мәнінде қызығушылық танытып, өнерге ерекше көңіл бөле бастады. Суретші қала пейзаждарын, натюрморт мен портреттерді орындау үшін, майлы бояу және акварель техникаларын пайдаланады. 2024 жылы Алматы қаласының Мемлекеттік архивінде «Дебют» атты алғашқы жеке көрмесі өтті. Сол жылы С.А. Полянская Қазақстан Республикасының Орталық мемлекеттік музейінде ұйымдастырылған «Көктемгі рапсодия» атты қалалық көрмесіне қатысты.

13-мамыр 2025-жылы сағат 10:00-де Әбілхан Кастеев атындағы ҚР Мемлекеттік өнер музейінің Орталық көрме залында (Желтоқсан 137), Алматы қаласы Білім басқармасының «Өнер мектебі» ҚМҚК-ның ұйымдастыруымен, «Бояулар құпиясы» атты жас суретшілердің Республикалық байқауы көрмесінің қалалық кезеңі өтеді.

22-сәуірде Орталық көрме залында Алматы қаласы бойынша аудандық кезеңдердің жеңімпаздары арасында өткен байқаудың қорытындысы шығарылды. Байқауға 12-17 жас аралығындағы балалар қатысты.

   Байқау жұмыстарын бағалау кезінде тақырып пен идея тереңдігі, мағынасы мен көркемдік шеберлігі, күрделілік деңгейі, түпнұсқа пен әсерлілік, композициялық құрылым, түстік шешіммен қатар, шығармашылық тәсіл ескерілді. Байқаудың мақсаты – жас суретшілердің шығармашылық қабілеттерін дамыту, олардың кәсіби бағдарларын ынталандыру. Байқаудың міндеті – жас суретшілерде эстетикалық, гуманистік және патриоттық сезімдерді қалыптастыру, әлемдік және отандық өнер дәстүрлеріне жеке қызығушылықтарын ояту болып табылады.

2025 жылы 12 мамырында сағат 16.00-де Ә. Қастеев атындағы ҚР Мемлекеттік өнер музейінің Орталық көрме залында (Желтоқсан 137) жыл сайынғы музей қызметкерлерінің қатысуымен өтетін «Көктем нұры» атты көрмесі ашылады. Көрме Ә. Қастеев атындағы ҚР Мемлекеттік өнер музейінің 90 жылдығына және 18 мамыр – дүниежүзілік музей күніне арналады.

Музей қызметкерлерінің «Көктем нұры» көрмесі жақсы дәстүрге айналып, 20 жылдан астам уақыт бойы өткізіліп келеді. Экспозицияда 180-нен астам жұмыстар ұсынылған. Бұл кескіндеме, графика, сәндік-қолданбалы өнер туындылары. Аталмыш көрмеге 33 суретші қатысуда.

2025 жылдың 8 мамыры күні сағат 16:00-де Әбілхан Қастеев атындағы ҚР Мемлекеттік өнер музейінде Ұлы Отан соғысындағы Жеңістің 80 жылдығына орай «Жеңістің жұлдызды сәті» атты ауқымды көрмесі ашылады.

Сурет, графика және мүсін өнеріндегі шығармалар халқымыздың өміріндегі қиын,  батырлық оқиғаларды әр түрлі ұрпақтың суретшілерінің көзімен көрсетеді. Ұлы Отан соғысына арналған көрмелер музейде жыл сайын өткізіледі, себебі бұл – барлық ұрпақтарға қажет  маңызды үлкен естелік.

2025 жылдың 6 мамырында Әбілхан Қастеев атындағы ҚР Мемлекеттік өнер музейінде «Вячеслав Люй-коның кескіндемесі мен графикасы» көрмесінің ашылу салтанаты өтеді.

Люй-коның жұмыстары Әбілхан Қастеев атындағы ҚР Мемлекеттік өнер музейінде, ҚР Ұлттық музейінде, сондай-ақ Қазақстан, Ресей, Германия, АҚШ, Канада, Түркия және басқа да елдердің жеке коллекцияларында сақтаулы.

Вячеслав Люй-ко – Қазақстандағы үлкен сұранысқа ие суретшілердің бірі. Ол қылқалам мен қарындашты бірдей шебер меңгерген, өзіндік қайталанбас және бірден танылатын стилімен ерекшеленеді.