2025 жылдың 6 мамырында Әбілхан Қастеев атындағы ҚР Мемлекеттік өнер музейінде «Вячеслав Люй-коның кескіндемесі мен графикасы» көрмесінің ашылу салтанаты өтеді.
Люй-коның жұмыстары Әбілхан Қастеев атындағы ҚР Мемлекеттік өнер музейінде, ҚР Ұлттық музейінде, сондай-ақ Қазақстан, Ресей, Германия, АҚШ, Канада, Түркия және басқа да елдердің жеке коллекцияларында сақтаулы.
Вячеслав Люй-ко – Қазақстандағы үлкен сұранысқа ие суретшілердің бірі. Ол қылқалам мен қарындашты бірдей шебер меңгерген, өзіндік қайталанбас және бірден танылатын стилімен ерекшеленеді.
Суретшінің туындылары — бұл классика мен заманауилықтың, мистикалық сарын мен философиялық тереңдіктің, ирония мен құпияның, астарлы мағына мен ортағасырлық фарстың, бүгінгі күн мен өткен дәуірлердің шежіресінің бірегей үйлесімі. Бұл — ой салатын, астары терең кенептер, астарлы әңгіме сынды суреттер.
Аталмыш көрме — өнер мен философияның тоғысуы, онда уақыттың тынысы, өмірдің мәңгілік сұрақтары және мәдени дәстүрлердің ұлылығы үйлеседі.
Әрбір кенеп пен графикалық беттер — бұл тек көрнекі объектілер емес, философиялық ізденістер, мұнда форма мен мазмұнның эстетикасы әлемнің ішкі үйлесімін ашады. Люй-ко шығармашылығында адам болмысының терең мәні, оның уақыт ағысымен үздіксіз байланысы және мәдениеттер, халықтар мен дәуірлердің өзара әрекеттері жанданады.
Суретшінің туындылары тек сыртқы шындықты бейнелеу емес, олар көрерменнің ішкі жандүниесіне үңіліп, терең философиялық ойларға жетелейді. В. Люй-коның шығармашылығы арқылы біз уақыт пен кеңістіктен асып түсетін, адамзат баласының мәңгілік ізденістері мен рухани толғаныстарын танимыз. Оның жұмыстары өткен мен бүгінді, болмыс пен арманды байланыстыра отырып, тіршіліктің мәні мен адамгершілік құндылықтар жайлы терең сұхбатқа шақырады.
«Вячеслав Люй-коның кескіндемесі мен графикасы» көрмесі — бұл жай ғана көрме емес, өнер философияға, ал философия өнерге айналатын әлемге сапар. Бұл суретшінің шығармашылығы арқылы дүниеге басқа қырынан қарауға, оның ішкі ізденістерімен бірге өмірді, сұлулықты тереңірек түсінуге мүмкіндік беретін ерекше сәт. Әрбір жұмыс бұл сұрақ, жауап және оларға табылған жаңа жолдар!
Суретшінің өзі былай дейді:
«Жаңалықтар, білім мен ақпарат тоқтаусыз, тасқындап ағылып жатыр, ал олардың ішінен қиял мен шындықты, ақиқат пен жалғанды айырып алу барған сайын қиындай түсуде.
Мен көрерменмен арғы бабаларымыз қолданған тілде – бейнелер мен символдар, өз әліпбиімнің белгілері арқылы сөйлесуге тырыстым. Өшпес мәңгілік жайлы да, уақыт шаңында жоғалып кетуі мүмкін нәрселер жайлы да сыр шертуге талпындым».
Көрмеде соңғы үш жыл ішінде жазылған сексеннен астам кескіндеме және графика туындылары қойылған.
Вячеслав Юрьевич Люй-ко 1963 жылы Мурманск қаласында дүниеге келген. 1968 жылы Қазақстанға қоныс аударады. Ал 1985 жылы Абай атындағы Қазақ педагогикалық институтының көркемсурет-графика факультетін тәмамдады. 1986–1988 жылдар аралығында аталған факультетте кескіндеме және кескіндеме технологиясы пәндерінен дәріс берді.
1987 жылдан бастап көптеген қалалық, республикалық, халықаралық және жеке көрмелерге қатысып келеді. 2006 жылы Вячеслав Қазақстан Меценаттар клубының «Тарлан» атты Ұлттық тәуелсіз сыйлығының лауреаты атанды. 2019 жылы — Еуразиялық сыйлықтың, ал 2023 жылы — «Umai» Ұлттық сыйлығының лауреаты болды.
2024 жылдан қазіргі уақытқа дейін – М. Лермонтов атындағы Ұлттық орыс драма театрының (Алматы қ., Қазақстан) бас суретшісі ретінде еңбек етеді.
Экспозиция мамыр айының 23-не дейін жалғасады.
Көрме кураторлары:
Акылбекова А.
Көпжүрсін Ә.
