2025 жылғы 25 шілдеде сағат 16:00-де Әбілхан Қастеев атындағы Қазақстан Республикасының Мемлекеттік өнер музейінде суретші-график, кітап иллюстраторы, ҚР Суретшілер Одағының мүшесі Құраш Зульфикардың «Аңыздар ізімен» атты жеке көрмесінің салтанатты ашылуы өтеді.

Көрме суретшінің 75 жылдық мерейтойына арналды. Бұл – Құраш Зульфикардың бүкіл шығармашылық жолын қамтитын үлкен көрме. Жарты ғасырдан астам уақыт ішінде салынған жүзден астам жұмысы осы жолы бір жерге тоғысып, көрерменге суретшінің жан-дүниесін, ізденіс пен өсу жолын көрсетуге мүмкіндік береді. Көрмеде алғашқы графикалық суреттерден бастап, кітаптарға салған иллюстрациялары мен соңғы жылдардағы нәзік акварельдеріне дейін бар.

2025 жылдың 18 шілдесінде сағат 16:00-де Әбілхан Қастеев атындағы ҚР Мемлекеттік өнер  музейінің қорынан алынған «МЕРЕЙТОЙ ИЕЛЕРІ-2025»  көрмесі ашылады.

Ұсынылып отырған  көрме 2025 жылы мерейтойы атап өтілетін белгілі қылқалам шеберлерінің шығармашылығына арналған. Экспозицияға бейнелеу өнерінің дамуына елеулі үлес қосып, еліміздің мәдени өмірінде өшпес із қалдырған суретшілердің туындылары қойылған. Бұл көрме ХХ ғасырда қазақстандық бейнелеу өнері мектебінің қалыптасу кезеңінде еңбек еткен әр буын өкілдерінің шығармашылығын тоғыстырады.

2025 жылдың 10 шілдесі күні сағат 16:00-де Әбілхан Қастеев атындағы Қазақстан Республикасының Мемлекеттік өнер музейінің Орталық көрме залында Узбаева Майра Ізкенқызының «Ізкеннің арманы» атты жеке көрмесінің ашылуы өтеді. Көрмеде автордың 21 туындысы ұсынылады.

Узбаева Майра Ізкенқызы 1972 жылы 1 сәуірде Тараз қаласында дүниеге келген. Өнерге деген қызығушылығы бала кезінен басталып, 1984 жылы Мемлекеттік көркемсурет мектебіне қабылданған сәттен бастап одан әрі шыңдала түсті. Мектепте композиция, сурет, кескіндеме, мүсін және өнер тарихы пәндерін меңгерді. Пленэрлік жұмыстарға қатысып, түрлі байқауларда өнерін танытты.

1989 жылы Жамбыл педагогикалық институтының Бейнелеу өнері және сызу факультетіне түсіп, кәсіби білім алды. Студент кезінде пастель, көмір, майлы бояу, акрил және акварель техникасында жұмыс істеді.

2025 жылдың 11 шілдесінде сағат 16:00-де Әбілхан Қастеев атындағы ҚР Мемлекеттік өнер музейінде көрнекті қазақстандық суретші Ибрагим Кубековты (1957-2025) еске алуға арналған көрменің ашылуы өтеді. Көрмеде автордың графика және кескіндеме жанрларында орындалған елуге жуық туындысы ұсынылады.

 Ретроспективті көрме көрерменді өмірдің қарапайым сәттерінен-ақ сан алуан сезім мен терең мағына таба білген талантты шебердің шығармашылығымен таныстырады. Көрме бүкіл ғұмырын өнерге қызмет етуге арнаған тамаша суретші әрі асыл жанның жарқын рухына тағзым ретінде ұйымдастырылып отыр.

2025 жылғы 9 шілдесінде сағат 16:00-де Әбілхан Қастеев атындағы ҚР Мемлекеттік өнер музейінде Қасымбековтер әулетінің шығармашылығына арналған «Өнерлі әулет өрнегі» атты көрменің салтанатты ашылуы өтеді.

«Өнерлі әулет өрнегі» көрмесі — Қазақстандағы ең жарқын шығармашылық әулеттердің бірі саналатын Қасымбековтер отбасына арналған ерекше мәдени шара. Бұл экспозиция ұрпақтар сабақтастығының терең тамырын, өнер мен руханияттың біртұтас желісін паш етеді. Қасымбековтер әулетінің түп-тамыры — Жетісу (Жоңғар) Алатауының етегіндегі қасиетті Талды өлкесінен тарайды. Бұл — табиғат пен тарих, ұлттық рух пен шығармашылық біте қайнасып, үйлесім тапқан құтты мекен.